فرســـــــــــــــــــــــــان ... وقصائد ...!!!

رائعة الامير عبدالله الرشيد امير حائل سابقا

اللي ذكر فيها العديد من الوقفات في حياته



ياهيه ياللي لي من الناس وداد=ماترحمون الحال ياعزوتي ليه



ماترحمون اللي غدا دمعه ابداد=جا له زمان وحرّق الدمع خدّيه



جا لي زمانٍ ماتهنيت برقاد=وقصر الحشا قامت تهدّم مبانيه



من يوم شفت الشوق مزبور الانهاد=ومجلّاٍ عن دار جدّه وأهاليه



وأقفى يجر الثوب للضلع شرّاد=امشلّحٍ ياطا على اطراف رجليه



الشوك ماله عن حيا الرجل ردّاد=الاّ ولا سبتٍ قويٍ يوقّيه



يامن يسوي له زرابيلٍ جداد=من الميّ لو ياطا على القطن يحفيه



بمشمرخات الهيف بالزحف صعّاد=وكم ماعرٍ من خوف الاروام راقيه



اخذ ثمانٍ مع ثمانٍ له ازواد=ولالقى من عزوته من يلفّيه



وجبّة سقاها من اول الوسم رعّاد=ماطالعت خشم ام سلمان تسقيه



حيث انها للمنهزم دار ميعاد=ومن لاذ به تقل الحرم لايذٍ فيه



ومسيخ ابن فرحان عريب الاجداد=كل العساكر نكّسّه تتلي البيه



نكّسّ بهم عامر ومحسن وفهاد=والكل منهم مارجع يم اهاليه



وفزنا على شهب الغوارب منه غاد=وكم عيّلٍ يبكي من القيظ شاويه



وجينا قليبٍ صايرٍ وسط الانفاد=بالخمس مع نصف الثمانين ندليه



لابن رخيص النازلٍ حد الاجراد=قال اقبلوا وانتم هل البيت ياهيه



يابن رخيص الحضر يبغون ببلاد=والحيضري بالهدي يكره تبدويه



ونبغي نقارب من هل الجوف خلاّد=وندعي عسى ان الوبل يسقي مفاليه



واهل سكاكا نعم بذالة الزاد=ونعم النكيف اليا لفى السير طاويه



اويّ والله يالضويحي من أجواد=ونعم الرفيق ليا نصى لمدح أهاليه



والمدح بدّو فيه لرشيد وبجاد=والكل منهم سيف يقطع بحدّيه



وشلنا على حمرٍ طويلات الابداد=يم الشمال ونيّه الهور نبغيه



كن جيت لي بدوانٍ بالاذواد ورّاد=وكلٍ يزين للعشاير نواديه



واحلو شرشوح المغاتير لانقاد=لادوّه الراعي بحلو التداويه



ليا الشط لي في يمّه الشط منقاد=كن الشفّلّح فوق موجه تجاريه



ياما عليه من المخاليق وعباد=والكل منهم وال الاقدار مشقيه



هذاك فلاحٍ وهذاك كرّاد=وهذا مريحٍ وساهراتٍ دواليه



وهذا يهل الغزل من فوق الاعواد=وهذاك يبرم له وهذا يساديه



كن جيت لي سوقٍ ورا جسر بغداد=كن الدبل كتفان يزهي بلوحيه



قبّة ذهب ياقوت حتى الزمرّاد=يزوغ قلب المسطحي وان مشى فيه



لاهو بشفٍ لي ولاهو بالامراد=ولاهو هواي وطاري النفس يطريه



من يوم جانا العلم تحرير الاوكاد=قيل العساكر غرّبوا تتلي البيه



وحنا بديرة من يعدّون الاجداد=هذا ولد عمّه وهذا بناخيه



هب الهوا ياذاري الريح وانقاد=ويامن يدور قضى حلاله واهاليه



الله يسوّد وجهكم ياهل الواد=سود السماء كل الخلايق تراعيه



من باب خدامٍ ليا باب عوّاد=ومن ينتخي بالضيغميه تطاليه



ياللي نسيتوا عمل الاجرب وفهّاد=ومن عقب هذا داخلينٍ قهاويه



حتى جرادٍ في جماعاتنا ساد=هذا يخسخس به وهذا مجلّيه



لو تجتمع كل الخلايق بميعاد=الاّ جرادٍ مالك الله نصافيه



والله لو انّي من ورا جسر بغداد=انّي لكم مثل العمل عند راعيه



عيسى يقول الحرب للمال نفّاد=والمال من هبّت نسايم ذواريه



ياللي تقول الشر مابه لنا ازواد=انشد مسوّي السيف وليه حانيه



لاصار ما يرويه من دم الاضداد=يدّيه يم العرفجيه وترويه



ولاصار مامرٍ يزغرت بالاكباد=ترى الموصّى يسفه اللي موصيه



ولاصار ما ناصل ونضرب بالاحداد=هبيت ياسيفٍ طوى الهم راعيه



ولاصار ماهمٍ بصنديد الاولاد=فألعن شبابٍ مايبهّيه راعيه

بريداوي ..



حطيت لك قصيدة حكمة



لا تصير ما سمعته

أحمد النااااصر الشايع




ليت العمر ينباع والله لشريه
وأروح للطيّب وأزوّد سنينه

وإلا الردي لعل تقصر لياليه
ما من وجوده فايده خابرينه

أفزع مع الطيّب عسى الله يخليه
اللي لفعل الطيب تبذل يمينه

خل الردي لعل تكثر بلاويه
ثقيل دم وفوق ذا ثقل طينه

ياللي عبيده تطلبه ثم ترجيه
أعطف على عبدك وقوّه بدينه

وإلا الردي ما همني وش يجي فيه
لو غاب ما همب العرب فاقدينه

لا واحسافه كيف يصبح مساويه
النذل والطيّب سوى بالسفينه

مواقف الطيّب تعزه وتغليه
وإلا الردي لعل ربي يهينه

أشكي على اللي شامخات هقاويه
أبو محمد جعل ربه يعينه

مواقفه هالحين وإلا بماضيه
ترفع له البيضاء على أعلى جبينه

اللي يلبي كل صوت يناديه
رجل المواقف كلنا عارفينه

إليا لفى كل الجماعة تحييه
أحد يحب الخشم وأحد يدينه

من حشمته كل يحبه ويغليه
أبو محمد جعل يبطي ونينه

أقول كلمة حق والله ما أرجيه
أرجي كريم كلنا عابرينه