اللي سهران ومصحصح يدخل ,,,,,

[size=24]فيه نظريه بعلم النفس تقول بعض الناس وخاصة النساء تجيهم طنات ليليه تبدأ الطنه الساعه وحده وتنتهي الفجر إذا صار الصبح تحسف الشخص وراه يسوي هالطنه

عاد أشوى الطنه اللي طنت لي مهيب تسايده يمكن ما أتحسف عليه الصبح

كل واحد يعلق على مثل من هالأمثال

1كل خوفنا من مانعه ! ما نعه هذي وحده ست

2كلا ريقه بثمه حلو !

3لا تقل حب حتى توكيه الغراره

4عرقة سدير جزاك الله خير

5 شاة أمس

6زبدة الهرج نيشان

7السوم زهره

8شبربريمه ربع قرص يضيمه

9 شخب طفح لا في يدي ولا في القدح

10 صفقت له نجد

11 ضربه المهمهيه

12 طشه ما وزنت

13 طوفن والحقن به

14طيرة جعل خن بط , إذا عرفتوا معناه تتوبون عن قولة خن بط اللي دايم تقولونه

15عنز الشيوخ نطاحه

16عورا وعصايه

17عيال الشيبه للخيبه

18غبت وقبت

19فلان مثل البرج ما ينتحرك , اللي ما يعرفه زين لا يفسره يطيح بورطه

20 يقاقي ولا يلاقي,,

21 في التنحه والتانحين,

22 قال وين الصياح ؟قال عاروض

23 كل يصدر بس ماكل يروس

24 لسانه تزلق به الصعوه ,

عاد تدرون مالي حويجه ورحمتكم به أحد قاعد بالسواليف غصب عليه تبي تجيه سكته إذا شاف هالموضوع يبي يقول حشا محششين ؟؟؟
بس لا يهمكم أحد علقوا على كيفكم

الــ راي ــق كتب:

نجمة طيّب قولي بطّة بطتنآ بطن بطّتكم ، تقدر بطّتكم تبط بطن بطّتنآ مثل مآبطّت بطّتنآ بطن بطّتكم 10 مرّآت

أنتي متأكّدة أن هالأمثآل عربيّه مهب عبريّه؟ ( وجه يقول عسى البلآ مهب بي يآرب )

أنا خفت تحسبونه تكميل لموضوع جلنار ,

شف شكل أم الهنوف تبي ترجمهنكلهن لننتظر معا

ام الهنوف كتب:

يقاقي ولا يلاقي

إهداء إلى مويه بارد بمناسبة بيع المنتدى

عذرا أم الهنوف تخطيتس سهو

بس ما قلتي لي واتس على مويه بارد ؟؟

ولا تحسبين الموضوع الحقيقه وين ؟ههههههههههه

17عيال الشيبه للخيبه

حلو هالمثل

خصوصا هالهروش اللي لا طق ستين صبغ شعره
وراح يدور له عروس صغيرة


لي رجعة للامثال

نجمة حلوة هالطنة

ام الهنوف كتب:

نجمه

الأهداء بعد ما فشل في شراء المنتدى هو وشيكه

سالفتن طويله

غثنا بلسانه ابشتري وابشتري وابشتري

يوم جا الصدز ما تشوفين إلا غبرة رجلينه

ساد من قال لتس تضيعين وتفوتين احداث عظيمه حدثت هنا

لا تلومين يمكن مهدد إن شراه يبون يحرقونه وهو نيم ؟؟

ههههههههههههفا يا ام الهنوف تقولينه بوجههههههههي سااااااااااااده

لا تصيرين أنت اللي مدبرة خطفي ليلة الهجوم على المنتدى ؟؟
خلين أتذكر أخر الأحداث !

ترا إلى هالحين ما راحت الشرهه عليكم وشلون تهجون عني ؟؟؟؟؟؟؟؟؟؟؟؟ظ

ام الهنوف

المثل ( عورا وعصاية )

ماتسنه اقرب لمويه من يقاقي ولا يلاقي

قطعناه الليلة

محبس الجن كتب:

17عيال الشيبه للخيبه

حلو هالمثل

خصوصا هالهروش اللي لا طق ستين صبغ شعره
وراح يدور له عروس صغيرة


لي رجعة للامثال

نجمة حلوة هالطنة

والله يابه هرش عندنا بالعايله يبي يتزوج ثانيه ما أدري يمديه يربي ولا يكملون خوالهم ؟؟

محبس الجن كتب:

ام الهنوف

المثل ( عورا وعصاية )

ماتسنه اقرب لمويه من يقاقي ولا يلاقي

قطعناه الليلة

صادز قطعتوه وبس إلا مشرحه ,

اللهم إني بريئه مما يصنعون !!!!!!!

لووك جديد كتب:

الله لايطننا الا بالعافيه

وش هالامثال اول مره اسمع بهن

بس رهيباات

تصدفين إن هالأمثال أوضح شي من اللي لقيت بالكتاب اللي عندي الباقي كنه من رموز الفراعنه !!!

مجنونهــــــــا كتب:

شكلكم شاربين من ماء المطر اللي نزل اليوم ولطيتوا هالماضوع

<< اللي فهمهن سبقوه عليهن

أقول زبدة الهرج نيشان لاتسبون إبن آخي وإلا ترا أبطخكم كلكم بالرصاص

<< ياروحي على اللي لط له مثل بمكان ابن لذينا

شوكرااان جزيلين...

على شان إبن ـخوك افسر لك معنى المثل

النيشان هو الشئ الذي يوضع على مكان بارز لكي يتسابق الرماة أيهم يصيبه أولا وزبدة الهرج أي أي الخلاصه ومجمل الكلام المهم اللي يجب التوجه إليه مباشره,,

شكرا لك مجنونها,,

اقتباس :

فيه نظريه بعلم النفس تقول بعض الناس وخاصة النساء تجيهم طنات ليليه تبدأ الطنه الساعه وحده وتنتهي الفجر إذا صار الصبح تحسف الشخص وراه يسوي هالطنه

هههههههههههههههههههههههههههههههههههههههه
---------------------------------------------------------------------

<<هذا الي فهمته ,,اما امثالك مدري وش تبي,,

الــ راي ــق كتب:

أبحآول أفسّر المثل رقم 5

5- شآة أمس : يُطلق على اللي سوّى شي وتوهّق فيه ، يعني طلع مهب قد الكلمة والحركة اللي سوّآه ، همّن صآر له شي عقب ، وهالمثل مأخوذ من ( من صيد أمس ) فكآن المقصود بالصيد هو الشآة ،، والله أعلم

Aشاااااااااطر صفقوا له

يالله بقي عشرين فسرهن ..

شهد الأيام كتب:

اقتباس :

فيه نظريه بعلم النفس تقول بعض الناس وخاصة النساء تجيهم طنات ليليه تبدأ الطنه الساعه وحده وتنتهي الفجر إذا صار الصبح تحسف الشخص وراه يسوي هالطنه

هههههههههههههههههههههههههههههههههههههههه
---------------------------------------------------------------------

<<هذا الي فهمته ,,اما امثالك مدري وش تبي,,

لا تفسرين الأمثال بس قول لي وشي الطنه اللي طنت لتس الليله ؟؟؟؟؟ظ

ماقل دل وزبدة الهرج نيشان

اعتقد انه مب مثل هو شطر من بيت شعري
قديم 00 احاول ان اتذكرة اليوم وباتسر وان شاء الله

اجيب لكم تكلمة البيت الشعري

محبس الجن كتب:

ماقل دل وزبدة الهرج نيشان

اعتقد انه مب مثل هو شطر من بيت شعري
قديم 00 احاول ان اتذكرة اليوم وباتسر وان شاء الله

اجيب لكم تكلمة البيت الشعري

أنا نقلت المثل من الكتاب على إنه مثل بس يمكن المؤلف حب يجيب شطر البيت كون الناس يستعملونه مثل ؟

السلام عليكم ..

اقتباس :

شخب طفح لا في يدي ولا في القدح

هذا مثل رهيب ..


الشخب (هو الحليب الخارج من الشاة أو غيرها عند الحلب) ..

فهو يقول انه طفح وانكب .. لاهو باليد ولاهو بالقدح اللي يحلب به

وهو كناية عن خروج الأمور عن السيطرة ..




شكرا نجمة موضوع جميل جدا


ربما كانت لي عووودة

اقتباس :

عنز الشيوخ نطاحه

هذا المقصود منه اترك عنك التحرش بمن هو أعلى منك قدرا


لأنهم عندهم من يدافع عنهم .. لو هي عنزهم

نجمة إمسيان كتب:

1كل خوفنا من مانعه ! ما نعه هذي وحده ست
** هذي شكله مرتن قشرااء بالحييل
يسد اسمه مانعه .. عندي احساس انه مرة ابووو ولاعنتن جدف عياال الاوله

2كلا ريقه بثمه حلو !
** هو صادز كلن ريقه حلو باثمه .. ياتي بمعنى كل واحد معجبه الشي اللي يمتلكه
وهذا يقابله المثل العربي المعروف : كل فتاه بابيها معجبه .

3لا تقل حب حتى توكيه الغراره
** هذا يبيله بحث وتحري واستفسار

4عرقة سدير جزاك الله خير
** ههههههههههههههههه لا يزعلون عليكم بعض الناس << يقصد راعية سدير عذبة التجريح
عرقة : يعني اجر
سدير : ديرة سدير المعروفه
جزاك الله خير: دعاء
ياتي بمعنى الاجر اللي يعطونك اياه اهل سدير للي يسدي لهم خدمه
قولهم جزاك الله خير
وهي مدحه وان فهمناها بخلاف ذلك
لان النبي صلى الله عليه وسلم ‏قال : (‏من استعاذ بالله فأعيذوه ومن سأل بالله فأعطوه ومن دعاكم فأجيبوه ومن صنع إليكم معروفا فكافئوه فإن لم تجدوا ما تكافئونه فادعوا له حتى تروا أنكم قد كافأتموه) .
[size=12]وقال رسول الله صلى الله عليه وسلم : (من صنع لاخيه معروفا ثم قال له جزاك الله خيرا فقد ابلغ في الثناء)
يعني عرقة اهل سدير احسن عرقه وافضل الكلام << يبي يرقع لهم

5 شاة أمس
** يمكن تاتي بنفس المعنى الذي جابه حلم القايله وهي صيد امس

6زبدة الهرج نيشان
** هذا شرحته نجمة امسيان
وهو نفس كلام محبس وننتظره يجيب لنا باقي الابيات

7السوم زهره
** ما اعرفه

8شبربريمه ربع قرص يضيمه
** كذلك اول مره اشوفه

9 شخب طفح لا في يدي ولا في القدح
** فسره رساوي الله يخليه لنا ذخر شبيه القمر

10 صفقت له نجد
** نجد الديار المعروفه
يعني مدحته او اعجبت بفعله وصفقت له
ياخوفي تصير نجد هذي اسم وحده
لاننا نقول مثل بيننا يالرجاجيل
نقول حين يدق جوال احدهم في مجلس صفقت له
يعني نادته مرته

11 ضربه المهمهيه
** شكله ضربه بالصميم
والمهمهيه تدل على اسم معين

12 طشه ما وزنت
** الطشه احتمال تكون الرميه
ماوزنت يعني لم يزنها صاحبها حين رميها لذلك اتت خاطئه

13 طوفن والحقن به
** طوفن اتوقع انه اسبقن
لكن وشلون تجي اسبقن والحقن به
ماودك الواحد يتفلسف واجد ويفسر الامثال

14طيرة جعل خن بط , إذا عرفتوا معناه تتوبون عن قولة خن بط اللي دايم تقولونه
** الله يستر .. وش معنى خن بط؟
ترانا نقول هالمثل واااجد

15عنز الشيوخ نطاحه
** ذكر تفسيره رساوي الله يخليه لنا

16عورا وعصايه
** يعني العين منبخقه وعوراء والراس مربوط بعصابه
العصابه هي الخرقه التي تربط على الراس
يقول البعض اذا بغى ينتخي بجماعته وربعه :
ياعصابة راسي وياحزام بطني

17عيال الشيبه للخيبه
** ياتي على سبيل التحسر والتألم
بان عيال اكبر القوم وهو الشيبه للخيبه اي للشي الخايب العايب

18غبت وقبت
** اتوقع ان اللي قايل هالمثل مصري
يقصد واحد سافر وغاب همن رجع محمل بالهدايا وجاب كل خير
غبت : من الغياب
قبت : يعني جبت المصري قلب الجيم قاف

19فلان مثل البرج ما ينتحرك , اللي ما يعرفه زين لا يفسره يطيح بورطه
** ابفسره واللي يصير يصير
ومدامتس قلتي اللي مايعرفه زين لايفسره يطيح بورطه
اكيد ان المقصود بالبرج غير البرج المعروف
لايصير البرج حق القاذورات يسمونه برج منول
والله ياهوو مثل دماااار ذااا
وفيه اساءه قووويه لمن يوجه له الكلام
ننتظر التفسير من الكتاب

20 يقاقي ولا يلاقي,,
** مثل قولنا هرج فلان لطلطه
يعني هرجه واجد وانا وانا وعند الصدز ماتشوف الا غباره
ولايلاقي خصومه .

21 في التنحه والتانحين,
** الظاهر انه مثل قولنا : فلان متنّح اي مفهي اي ساهي او ساج

22 قال وين الصياح ؟قال عاروض
** ما اعرفه

23 كل يصدر بس ماكل يروس
** هذا مثل فلالييح .. اسالوا عنه بريداوي اصيل ويعلمكم

24 لسانه تزلق به الصعوه ,
** الصعوه خابره طير
هالمثل يذم الشخص اللي مايتحفظ بهرجه ولا يوزن الكلمه قبل يطلعه
لذك لو توقع صعوه على لسانه زلقت
رغم انه في الغالب مايزلق الا الثقيل بالجسم البطي بالحركه والصعوه خلاف ذلك
وهذا كنايه عن كثرة بربسه راعي اللسان

:D

ولايفوتني ان اشكر رساوي على وضع الصوره الجميله في توقيعي
واقوله :
جزاك الله خير

:D